الناس البليده

بين جرات السبيب وبين تنويع القصايد
قلت اعبر ماجرى في خاطري باصدق قصيده
لو نشدت الحرف عند البعض به ناقص وزايد
يايقصر في عطا صافي البحر والا يزيده
صفقيله يالمجله وانشريله يالجرايد
عقبها هاجم خلف هذال في وسط الجريده
راحت الساحه تفاهه بين عيد وبين عايد
دايم نفس الكلام الي يقولونه يعيده
يارجال العرف والا ياوسيعين البنايد
انتهض راس المعنا واحتمى راس الحديده
طير ابن برمان لو تثني عليه الناس صايد
لاكنن فرقه على باقي الحرار الي يصيده
لاسلم راعيه منه ولابعد جاب الفوايد
هي كذا العالم كثير اشكال وانواعن عديده
يحسبون الطيب هين مادروا بالطيب كايد
والرجال الي تبين من يجيب الطيب بيده
من بغى يرقا بفعله مايعرض للنقايد
النقيده لارقا في لابته والا عظيده
الوفي تلقاه عند اهل الوفا واهل العوايد
والردي لو هو مسك باعلى المناصب ماتفيده
ولو سمعت القول سنّد بالسند تلقى سنايد
لاتطيح بحفرة الجهيل والنظره بعيده
مايبين لك خوي ياكود في وقت الشدايد
اما خيبّب لك ضنونك والا يطلعلك وليده
مانقول الا الصحيح ومانجيب الا الجدايد
والليالي دايره وانفهّم الناس البليده